Guwahati: ਵਿਸ਼ਵ ਪ੍ਰਸਿੱਧ ਅੰਬੂਬਾਸੀ ਮੇਲਾ ਸ਼ੁਰੂ ਹੋਣ ਤੋਂ ਬਾਅਦ ਬੁੱਧਵਾਰ ਨੂੰ ਕਾਮਾਖਿਆ ਮੰਦਿਰ ਨੂੰ ਸ਼ੁੱਧੀ ਹੋ ਗਈ ਅਤੇ ਮੰਦਰ ਦੇ ਦਰਵਾਜ਼ੇ ਸ਼ਰਧਾਲੂਆਂ ਲਈ ਖੋਲ੍ਹ ਦਿੱਤੇ ਗਏ। ਕਈ ਦਿਨਾਂ ਤੋਂ ਕਤਾਰ ਵਿੱਚ ਖੜ੍ਹੇ ਸ਼ਰਧਾਲੂਆਂ ਨੂੰ ਮਾਂ ਕਾਮਾਖਿਆ ਪੀਠ ਨੂੰ ਛੂਹਣ ਦਾ ਮੌਕਾ ਵੀ ਮਿਲਿਆ।
ਗੁਵਾਹਾਟੀ ਦੇ ਮਾਂ ਕਾਮਾਖਿਆ ਮੰਦਰ ‘ਚ ਸ਼ਨੀਵਾਰ ਤੋਂ ਵਿਸ਼ਵ ਪ੍ਰਸਿੱਧ ਅੰਬੂਬਾਸੀ ਮੇਲਾ ਸ਼ੁਰੂ ਹੋ ਗਿਆ ਸੀ। ਸ਼ਨੀਵਾਰ ਸਵੇਰੇ 8.43 ਵਜੇ ਮਾਂ ਕਾਮਾਖਿਆ ਮੰਦਰ ਦੇ ਦਰਵਾਜ਼ੇ ਬੰਦ ਕਰ ਦਿੱਤੇ ਗਏ ਸਨ। 25 ਜੂਨ ਮੰਗਲਵਾਰ ਦੀ ਰਾਤ 9.07 ਵਜੇ ਅੰਬੂਬਾਸੀ ਦੀ ਨਿਵਰ੍ਰਤੀ ਹੋ ਗਈ। ਇਸ ਤੋਂ ਬਾਅਦ ਰਜਸਵਲਾ (ਮਾਹਵਾਰੀ) ਹੋਈ ਮਾਂ ਕਾਮਾਖਿਆ ਦੀ ਸ਼ੁੱਧੀ ਹੋ ਗਈ। ਮੰਦਰ ਦੀ ਸਫਾਈ ਤੋਂ ਬਾਅਦ ਬੁੱਧਵਾਰ ਸਵੇਰ ਤੋਂ ਹੀ ਮੰਦਰ ਦੇ ਦਰਵਾਜ਼ੇ ਫਿਰ ਤੋਂ ਦਰਸ਼ਨਾਂ ਲਈ ਖੋਲ੍ਹ ਦਿੱਤੇ ਗਏ।
ਇੱਥੇ ਹਰ ਸਾਲ 22 ਜੂਨ ਤੋਂ ਮਾਂ ਕਾਮਾਖਿਆ ਨੂੰ ਮਾਹਵਾਰੀ ਆਉਣ ’ਤੇ ਅੰਬੂਬਾਸੀ ਮੇਲਾ ਲਗਾਇਆ ਜਾਂਦਾ ਹੈ। ਇਸ ਪਰੰਪਰਾ ਦੇ ਕਾਰਨ ਅਸਾਮ ਵਿੱਚ ਜਦੋਂ ਕੁੜੀਆਂ ਨੂੰ ਪਹਿਲੀ ਵਾਰ ਮਾਹਵਾਰੀ ਆਉਂਦੀ ਹੈ, ਤਾਂ ਇਸਨੂੰ ਤਿਉਹਾਰ ਵਜੋਂ ਮਨਾਇਆ ਜਾਂਦਾ ਹੈ। ਇਸਨੂੰ ਤੁਲਨੀ ਵਿਆਹ ਦੇ ਨਾਮ ਨਾਲ ਜਾਣਿਆ ਜਾਂਦਾ ਹੈ। ਇਸ ਦੌਰਾਨ ਮੰਦਰ ਦੀ ਸਫਾਈ ਤੋਂ ਇਲਾਵਾ ਕੋਈ ਪੂਜਾ ਨਹੀਂ ਕੀਤੀ ਜਾਂਦੀ ਹੈ। ਇਹ ਚਾਰ ਦਿਨ ਪੂਰੇ ਆਸਾਮ ਵਿੱਚ ਅਪਵਿੱਤਰ ਮੰਨੇ ਜਾਂਦੇ ਹਨ। ਇਸ ਦੌਰਾਨ ਸੂਬੇ ਦੇ ਸਾਰੇ ਮੰਦਰਾਂ ਦੇ ਨਾਲ-ਨਾਲ ਲੋਕਾਂ ਦੇ ਘਰਾਂ ‘ਚ ਪੂਜਾ-ਪਾਠ ਵੀ ਬੰਦ ਰਹਿੰਦੇ ਹਨ।
ਅੰਬੂਬਾਸੀ ਮੇਲੇ ਦੌਰਾਨ ਹਰ ਸਾਲ ਦੀ ਤਰ੍ਹਾਂ ਇਸ ਸਾਲ ਵੀ ਦੇਸ਼-ਵਿਦੇਸ਼ ਤੋਂ ਲੱਖਾਂ ਦੀ ਗਿਣਤੀ ਵਿੱਚ ਸ਼ਰਧਾਲੂ ਇੱਥੇ ਪੁੱਜੇ ਹਨ। ਆਸਾਮ ਸਰਕਾਰ ਦੇ ਵੱਖ-ਵੱਖ ਵਿਭਾਗਾਂ ਨੇ ਅੰਬੂਬਾਸੀ ਮੇਲੇ ਦੀਆਂ ਤਿਆਰੀਆਂ ਇਕ ਮਹੀਨਾ ਪਹਿਲਾਂ ਹੀ ਸ਼ੁਰੂ ਕਰ ਦਿੱਤੀਆਂ ਸਨ। ਵਿਭਾਗੀ ਕਰਮਚਾਰੀ ਅਤੇ ਅਧਿਕਾਰੀ ਹਰ ਥਾਂ ‘ਤੇ ਤਾਇਨਾਤ ਹਨ। ਕਾਮਾਖਿਆ ਰੇਲਵੇ ਸਟੇਸ਼ਨ, ਗੁਵਾਹਾਟੀ ਰੇਲਵੇ ਸਟੇਸ਼ਨ, ਪਾਂਡੂ, ਕਾਮਾਖਿਆ ਫਾਟਕ ਦੇ ਨਾਲ-ਨਾਲ ਕਾਮਾਖਿਆ ਮੰਦਿਰ ਕੰਪਲੈਕਸ ‘ਤੇ ਵੱਖ-ਵੱਖ ਟੁਕੜੀਆਂ ਵਿਚ ਸਰਕਾਰੀ ਕਰਮਚਾਰੀ ਤਾਇਨਾਤ ਕੀਤੇ ਗਏ ਹਨ। ਸ਼ਰਧਾਲੂਆਂ ਦੀ ਸਹੂਲਤ ਲਈ, ਉੱਤਰ ਪੂਰਬ ਫਰੰਟੀਅਰ ਰੇਲਵੇ ਨੇ ਅੰਬੂਬਾਸੀ ਮੇਲੇ ਦੌਰਾਨ ਵਿਸ਼ੇਸ਼ ਜਨਰਲ ਰੇਲਗੱਡੀ ਚਲਾਈ। ਇਸ ਦੌਰਾਨ ਆਉਣ ਵਾਲੇ ਸ਼ਰਧਾਲੂਆਂ ਨੂੰ ਕਿਸੇ ਕਿਸਮ ਦੀ ਦਿੱਕਤ ਦਾ ਸਾਹਮਣਾ ਨਾ ਕਰਨਾ ਪਵੇ ਇਸ ਲਈ ਹਰ ਸੰਭਵ ਉਪਾਅ ਕੀਤੇ ਗਏ ਹਨ। ਇਸ ਵਾਰ ਨੀਲਾਂਚਲ ਪਹਾੜ ਦੇ ਹੇਠਾਂ ਹੀ ਲੋਕਾਂ ਲਈ ਜੁੱਤੀਆਂ ਅਤੇ ਚੱਪਲਾਂ ਰੱਖਣ ਦਾ ਪ੍ਰਬੰਧ ਕੀਤਾ ਗਿਆ ਸੀ। ਨਵੇਂ ਬਣੇ ਫਲਾਈਓਵਰ ਦੇ ਹੇਠਾਂ ਜੁੱਤੀਆਂ ਅਤੇ ਚੱਪਲਾਂ ਨੂੰ ਸਟੋਰ ਕਰਨ ਲਈ ਇੱਕ ਵਿਸ਼ਾਲ ਰੈਕ ਬਣਾਇਆ ਗਿਆ। ਧੁੱਪ ਦੇ ਦਿਨਾਂ ਦੌਰਾਨ ਸੜਕ ‘ਤੇ ਪਾਣੀ ਛਿੜਕਣ ਅਤੇ ਗਲੀਚੇ ਵਿਛਾਉਣ ਦਾ ਵੀ ਪ੍ਰਬੰਧ ਕੀਤਾ ਗਿਆ ਹੈ।
ਉੱਥੇ ਹੀ 22 ਤੋਂ 27 ਜੂਨ ਤੱਕ ਕਾਮਾਖਿਆ ਮੰਦਿਰ ਦੇ ਦਰਸ਼ਨਾਂ ਲਈ ਸਾਰੇ ਵੀਆਈਪੀ ਪਾਸ ਪ੍ਰਬੰਧਾਂ ਨੂੰ ਮੁਲਤਵੀ ਕਰ ਦਿੱਤਾ ਗਿਆ ਹੈ। ਇਸ ਦੌਰਾਨ ਕਿਸੇ ਵੀਆਈਪੀ ਨੂੰ ਦਰਸ਼ਨਾਂ ਦੀ ਵਿਸ਼ੇਸ਼ ਸਹੂਲਤ ਨਹੀਂ ਦਿੱਤੀ ਜਾ ਰਹੀ ਹੈ। ਇਸਦੇ ਨਾਲ ਹੀ ਅੰਬੂਬਾਸੀ ਮੇਲੇ ਲਈ ਸੁਰੱਖਿਆ ਦੇ ਸਖ਼ਤ ਪ੍ਰਬੰਧ ਕੀਤੇ ਗਏ ਸਨ। ਸੁਰੱਖਿਆ ਨੂੰ ਤਿੰਨ ਸ਼੍ਰੇਣੀਆਂ ਵਿੱਚ ਵੰਡਿਆ ਗਿਆ ਸੀ। ਇਸ ਦੌਰਾਨ ਮੰਦਰ ਪਰਿਸਰ ਦੀ ਸੁਰੱਖਿਆ, ਮੇਲੇ ਵਿੱਚ ਆਉਣ ਵਾਲੇ ਸ਼ਰਧਾਲੂਆਂ ਦੀ ਸੁਰੱਖਿਆ ਅਤੇ ਆਵਾਜਾਈ ਦੇ ਪੁਖਤਾ ਪ੍ਰਬੰਧ ਕੀਤੇ ਗਏ ਸਨ। ਵੱਡੀ ਗਿਣਤੀ ਵਿੱਚ ਪੁਲਿਸ ਅਧਿਕਾਰੀ ਤੇ ਪੁਲਿਸ ਮੁਲਾਜ਼ਮ ਤਾਇਨਾਤ ਕੀਤੇ ਗਏ ਹਨ।
ਹਿੰਦੂਸਥਾਨ ਸਮਾਚਾਰ
