ਨਵੀਂ ਦਿੱਲੀ, 14 ਜਨਵਰੀ (ਹਿੰ.ਸ.)। ਅਵਾਕਸ ਅਪੈਰਸਜ਼ ਐਂਡ ਓਰਨਾਮੈਂਟਸ ਦੇ ਸ਼ੇਅਰਾਂ ਨੇ ਅੱਜ ਆਪਣੇ ਆਈਪੀਓ ਨਿਵੇਸ਼ਕਾਂ ਨੂੰ ਜ਼ੋਰਦਾਰ ਮੁਨਾਫਾ ਕਰਵਾਇਆ। ਆਈਪੀਓ ਤਹਿਤ ਕੰਪਨੀ ਦੇ ਸ਼ੇਅਰ 70 ਰੁਪਏ ਦੀ ਕੀਮਤ ‘ਤੇ ਜਾਰੀ ਕੀਤੇ ਗਏ ਸਨ। ਅੱਜ ਇਨ੍ਹਾਂ ਦੀ ਬੀਐਸਈ ਦੇ ਐਸਐਮਈ ਪਲੇਟਫਾਰਮ ‘ਤੇ 90 ਪ੍ਰਤੀਸ਼ਤ ਦੇ ਪ੍ਰੀਮੀਅਮ ਦੇ ਨਾਲ 133 ਰੁਪਏ ਦੀ ਕੀਮਤ ‘ਤੇ ਲਿਸਟਿੰਗ ਹੋਈ। ਸੂਚੀਬੱਧ ਹੋਣ ਦੇ ਤੁਰੰਤ ਬਾਅਦ, ਸ਼ੇਅਰ ਖਰੀਦਦਾਰੀ ਦੇ ਸਮਰਥਨ ਨਾਲ 139.65 ਰੁਪਏ ਦੇ ਉਪਰਲੇ ਸਰਕਟ ਪੱਧਰ ‘ਤੇ ਪਹੁੰਚ ਗਿਆ। ਇਸ ਤਰ੍ਹਾਂ ਕੰਪਨੀ ਦੇ ਆਈਪੀਓ ਨਿਵੇਸ਼ਕਾਂ ਦਾ ਪੈਸਾ ਪਹਿਲੇ ਦਿਨ ਹੀ ਲਗਭਗ ਦੁੱਗਣਾ ਹੋ ਗਿਆ ਹੈ।
ਅਵਾਕਸ ਅਪੈਰਸਜ਼ ਐਂਡ ਓਰਨਾਮੈਂਟਸ ਦਾ 1.92 ਕਰੋੜ ਰੁਪਏ ਦਾ ਆਈਪੀਓ 7 ਤੋਂ 9 ਜਨਵਰੀ ਦਰਮਿਆਨ ਸਬਸਕ੍ਰਿਪਰਸ਼ਨ ਲਈ ਖੁੱਲ੍ਹਾ ਸੀ। ਇਸ ਆਈਪੀਓ ਨੂੰ ਨਿਵੇਸ਼ਕਾਂ ਵੱਲੋਂ ਭਰਵਾਂ ਹੁੰਗਾਰਾ ਮਿਲਿਆ, ਜਿਸ ਕਾਰਨ ਇਸਨੂੰ ਕੁੱਲ ਮਿਲਾ ਕੇ 260.42 ਗੁਣਾ ਸਬਸਕ੍ਰਾਈਬ ਕੀਤਾ ਗਿਆ। ਇਹਨਾਂ ਵਿੱਚੋਂ, ਗੈਰ-ਸੰਸਥਾਗਤ ਨਿਵੇਸ਼ਕਾਂ ਲਈ ਰਿਜ਼ਰਵ ਹਿੱਸੇ ਵਿੱਚ 140.46 ਗੁਣਾ ਸਬਸਕ੍ਰਾਈਬ ਮਿਲਿਆ ਸੀ। ਇਸ ਤੋਂ ਇਲਾਵਾ, ਪ੍ਰਚੂਨ ਨਿਵੇਸ਼ਕਾਂ ਲਈ ਰਿਜ਼ਰਵ ਹਿੱਸੇ ਨੂੰ 372.35 ਗੁਣਾ ਸਬਸਕ੍ਰਾਈਬ ਕੀਤਾ ਗਿਆ ਸੀ। ਕੰਪਨੀ ਆਈਪੀਓ ਰਾਹੀਂ ਇਕੱਠੇ ਕੀਤੇ ਪੈਸੇ ਦੀ ਵਰਤੋਂ ਕਾਰਜਸ਼ੀਲ ਪੂੰਜੀ ਦੀਆਂ ਲੋੜਾਂ ਅਤੇ ਹੋਰ ਆਮ ਕਾਰਪੋਰੇਟ ਉਦੇਸ਼ਾਂ ਨੂੰ ਪੂਰਾ ਕਰਨ ਲਈ ਕਰੇਗੀ।
2005 ਵਿੱਚ ਸ਼ੁਰੂ ਹੋਈ ਇਹ ਕੰਪਨੀ ਬੁਣੇ ਹੋਏ ਕੱਪੜਿਆਂ ਦਾ ਥੋਕ ਕਾਰੋਬਾਰ ਕਰਦੀ ਹੈ। ਇਸ ਦੇ ਨਾਲ ਹੀ ਕੰਪਨੀ ਚਾਂਦੀ ਦੇ ਗਹਿਣਿਆਂ ਦੀ ਆਨਲਾਈਨ ਰਿਟੇਲ ਵਿਕਰੀ ਕਰਦੀ ਹੈ। ਇਨ੍ਹਾਂ ਗਹਿਣਿਆਂ ਵਿੱਚ ਔਰਤਾਂ ਲਈ ਝਾਂਜਰਾਂ, ਮਰਦਾਂ ਲਈ ਬਰੇਸਲੇਟ, ਮੁੰਦਰੀਆਂ, ਪਲੇਟ ਸੈੱਟ, ਗਲਾਸ, ਚੂੜੀਆਂ, ਕਟੋਰੇ, ਚੇਨ ਅਤੇ ਹੋਰ ਗਹਿਣੇ ਸ਼ਾਮਲ ਹਨ। ਕੰਪਨੀ ਦਾ ਨੈੱਟਵਰਕ ਦੇਸ਼ ਭਰ ਵਿੱਚ ਫੈਲਿਆ ਹੋਇਆ ਹੈ। ਪ੍ਰਾਸਪੈਕਟਸ ਵਿੱਚ ਕੀਤੇ ਗਏ ਦਾਅਵੇ ਅਨੁਸਾਰ ਕੰਪਨੀ ਦੇ ਮੁਨਾਫੇ ਵਿੱਚ ਲਗਾਤਾਰ ਵਾਧਾ ਹੋਇਆ ਹੈ।
ਹਿੰਦੂਸਥਾਨ ਸਮਾਚਾਰ
