New Delhi: ਐਨਵੀਡੀਆ ਐਪਲ ਨੂੰ ਪਛਾੜ ਕੇ ਦੂਜੀ ਵਾਰ ਦੁਨੀਆ ਦੀ ਸਭ ਤੋਂ ਮੁੱਲਵਾਨ ਕੰਪਨੀ ਬਣ ਗਈ ਹੈ। ਐਨਵੀਡੀਆ ਨੇ ਬਾਜ਼ਾਰ ਪੂੰਜੀਕਰਣ (ਮਾਰਕੀਟ ਕੈਪ) ਦੇ ਆਧਾਰ ‘ਤੇ ਐਪਲ ਨੂੰ ਪਛਾੜ ਦਿੱਤਾ ਹੈ। ਮੰਗਲਵਾਰ ਨੂੰ ਕਾਰੋਬਾਰ ਦੌਰਾਨ, ਐਨਵੀਡੀਆ ਦੇ ਸ਼ੇਅਰ ਲਗਭਗ 3 ਫੀਸਦੀ ਦੇ ਵਾਧੇ ਨਾਲ 3.43 ਟ੍ਰਿਲੀਅਨ ਡਾਲਰ ‘ਤੇ ਬੰਦ ਹੋਏ, ਜੋ ਕਿ ਐਪਲ ਦੇ 3.38 ਟ੍ਰਿਲੀਅਨ ਡਾਲਰ ਦੇ ਮਾਰਕੀਟ ਕੈਪ ਤੋਂ ਵੱਧ ਹੈ। ਦੂਜੇ ਪਾਸੇ ਮਾਈਕ੍ਰੋਸਾਫਟ 3.1 ਟ੍ਰਿਲੀਅਨ ਡਾਲਰ ਦੀ ਮਾਰਕੀਟ ਕੈਪ ਦੇ ਨਾਲ ਤੀਜੇ ਸਥਾਨ ‘ਤੇ ਰਹੀ।
ਐਨਵੀਡੀਆ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ (ਸੀਈਓ) ਜੇਨਸਨ ਹੁਆਂਗ ਦੀ ਅਗਵਾਈ ਵਿੱਚ, ਕੰਪਨੀ ਨੇ ਜੂਨ ਵਿੱਚ ਪਹਿਲੀ ਵਾਰ ਐਪਲ ਨੂੰ ਪਛਾੜ ਦਿੱਤਾ ਸੀ, ਉਦੋਂ ਇਹ ਸਿਰਫ ਇੱਕ ਦਿਨ ਲਈ ਸੀ। ਦੁਨੀਆ ਦੀ ਸਭ ਤੋਂ ਵੱਡੀ ਕੰਪਨੀ ਬਣਨ ਦੇ ਮਾਮਲੇ ‘ਚ ਗ੍ਰਾਫਿਕਸ ਚਿਪ ਨਿਰਮਾਤਾ ਕੰਪਨੀ ਐਨਵੀਡੀਆ ਨੇ ਬਾਜ਼ਾਰ ਮੁੱਲ ਦੇ ਆਧਾਰ ‘ਤੇ ਐਪਲ ਨੂੰ ਪਿੱਛੇ ਛੱਡ ਦਿੱਤਾ ਹੈ। ਐਨਵੀਡੀਆ ਨੇ 28 ਜੁਲਾਈ ਨੂੰ ਖਤਮ ਹੋਈ ਦੂਜੀ ਤਿਮਾਹੀ ਵਿੱਚ 30 ਅਰਬ ਡਾਲਰ ਦੀ ਆਮਦਨ ਦੀ ਰਿਪੋਰਟ ਕੀਤੀ, ਜੋ ਪਿਛਲੀ ਤਿਮਾਹੀ ਨਾਲੋਂ 15 ਫੀਸਦੀ ਅਤੇ ਪਿਛਲੇ ਸਾਲ ਨਾਲੋਂ 122 ਫੀਸਦੀ ਵੱਧ ਹੈ।
ਕੰਪਨੀ ਦੇ ਸੀਈਓ ਜੇਨਸਨ ਹੁਆਂਗ ਨੇ ਬੁੱਧਵਾਰ ਨੂੰ ਇਕ ਬਿਆਨ ‘ਚ ਕਿਹਾ ਕਿ ਉਨ੍ਹਾਂ ਦੇ ‘ਹੋਪਰ’ ਚਿਪਸ ਦੀ ਮੰਗ ਮਜ਼ਬੂਤ ਬਣੀ ਹੋਈ ਹੈ ਅਤੇ ਆਉਣ ਵਾਲੇ ‘ਬਲੈਕਵੈਲ’ ਚਿਪਸ ਨੂੰ ਲੈ ਕੇ ਕਾਫੀ ਉਤਸ਼ਾਹ ਵੀ ਹੈ। ਡੇਟਾ ਸੈਂਟਰਾਂ ਵਿੱਚ ਏਆਈ ਅਤੇ ਤੇਜ਼ ਕੰਪਿਊਟਿੰਗ ਤਕਨਾਲੋਜੀ ਲਈ ਵੱਡੇ ਪੱਧਰ ‘ਤੇ ਅੱਪਗ੍ਰੇਡ ਹੋ ਰਹੇ ਹਨ, ਜਿਸ ਕਾਰਨ ਕੰਪਨੀ ਦੀ ਕਮਾਈ ਰਿਕਾਰਡ ਪੱਧਰ ‘ਤੇ ਪਹੁੰਚ ਗਈ ਹੈ। ਜ਼ਿਕਰਯੋਗ ਹੈ ਕਿ ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਦੇ ਇਸ ਦੌਰ ਵਿੱਚ 3ਡੀ ਗੇਮਾਂ ਖੇਡਣ ਲਈ ਚਿਪਸ ਬਣਾਉਣ ਲਈ ਸਾਲ 1991 ਵਿੱਚ ਸਥਾਪਿਤ ਐਨਵੀਡੀਆ ਨੇ ਹਾਲ ਹੀ ਦੇ ਸਾਲਾਂ ਵਿੱਚ ਇੱਕ ਬਹੁਤ ਹੀ ਵੱਖਰੇ ਕਾਰਨਾਂ ਨਾਲ ਆਪਣੀ ਪਛਾਣ ਬਣਾਈ ਹੈ।
ਹਿੰਦੂਸਥਾਨ ਸਮਾਚਾਰ
