Bastar News: ਬਸਤਰ ਰੇਂਜ ਦੇ ਪੁਲਸ ਇੰਸਪੈਕਟਰ ਜਨਰਲ ਸੁੰਦਰਰਾਜ ਪੀ ਨੇ ਅੱਜ ਨਕਸਲੀ ਮੁਕਾਬਲੇ ਬਾਰੇ ਅਧਿਕਾਰਤ ਜਾਣਕਾਰੀ ਦਿੱਤੀ। ਮੀਡੀਆ ਨੂੰ ਜਾਰੀ ਪ੍ਰੈਸ ਨੋਟ ਵਿੱਚ ਮੁਕਾਬਲੇ ਵਿੱਚ ਮਾਰੇ ਗਏ ਨਕਸਲੀਆਂ ਦੀਆਂ ਲਾਸ਼ਾਂ ਦੀ ਗਿਣਤੀ 31 ਦੱਸੀ ਗਈ ਹੈ। ਮੌਕੇ ਤੋਂ ਐਲਐਮਜੀ ਰਾਈਫਲ, ਐਸਐਲਆਰ ਰਾਈਫਲ, ਏਕੇ 47 ਰਾਈਫਲ, ਇੰਸਾਸ ਰਾਈਫਲ, ਕੈਲੀਬਰ-303 ਰਾਈਫਲ ਅਤੇ ਹੋਰ ਕਈ ਹਥਿਆਰ ਬਰਾਮਦ ਕੀਤੇ ਗਏ ਹਨ। ਘਟਨਾ ਵਾਲੀ ਥਾਂ ਦੇ ਆਲੇ-ਦੁਆਲੇ ਤਲਾਸ਼ੀ ਮੁਹਿੰਮ ਅਜੇ ਵੀ ਜਾਰੀ ਹੈ।
ਪੁਲਸ ਦੇ ਇੰਸਪੈਕਟਰ ਜਨਰਲ ਨੇ ਦੱਸਿਆ ਕਿ ਇਹ ਮੁਕਾਬਲਾ ਸ਼ੁੱਕਰਵਾਰ ਦੁਪਹਿਰ ਕਰੀਬ 1 ਵਜੇ ਨਾਰਾਇਣਪੁਰ-ਦਾਂਤੇਵਾੜਾ ਅੰਤਰ-ਜ਼ਿਲ੍ਹਾ ਸਰਹੱਦ ‘ਤੇ ਅਬੂਝਮਾੜ ਦੇ ਥੁਲਥੁਲੀ ਅਤੇ ਨੇਂਦੂਰ ਪਿੰਡਾਂ ਦੇ ਵਿਚਕਾਰ ਜੰਗਲ ਵਿੱਚ ਸ਼ੁਰੂ ਹੋਇਆ। ਦੰਤੇਵਾੜਾ ਅਤੇ ਨਰਾਇਣਪੁਰ ਦੇ ਡੀਆਰਜੀ ਅਤੇ ਸਪੈਸ਼ਲ ਟਾਸਕ ਫੋਰਸ (STF) ਦੇ ਜਵਾਨ ਇਸ ਕਾਰਵਾਈ ਵਿੱਚ ਸ਼ਾਮਲ ਸਨ। ਇਹ ਮੁਹਿੰਮ ਵੀਰਵਾਰ ਦੁਪਹਿਰ ਨੂੰ ਸ਼ੁਰੂ ਕੀਤੀ ਗਈ ਸੀ। ਇਸ ਆਪਰੇਸ਼ਨ ਦੌਰਾਨ ਸੂਚਨਾ ਮਿਲੀ ਸੀ ਕਿ ਕੰਪਨੀ ਨੰਬਰ 6 ਅਤੇ ਪੂਰਬੀ ਬਸਤਰ ਡਵੀਜ਼ਨ ਦੇ ਮਾਓਵਾਦੀ ਗਵਾੜੀ, ਥੁਲਥੁਲੀ, ਨੇਂਦੂਰ ਅਤੇ ਰੇਂਗਵਾਯਾ ਪਿੰਡਾਂ ਦੀਆਂ ਪਹਾੜੀਆਂ ‘ਤੇ ਮੌਜੂਦ ਹਨ।
ਆਈਜੀ ਬਸਤਰ ਰੇਂਜ ਸੁੰਦਰਰਾਜ ਨੇ ਦੱਸਿਆ ਕਿ ਅੱਜ ਸਵੇਰੇ ਤਿੰਨ ਹੋਰ ਨਕਸਲੀਆਂ ਦੀਆਂ ਲਾਸ਼ਾਂ ਸੰਘਣੇ ਜੰਗਲ ਵਿੱਚੋਂ ਬਰਾਮਦ ਕੀਤੀਆਂ ਗਈਆਂ ਹਨ ਜਿੱਥੇ ਸ਼ੁੱਕਰਵਾਰ ਨੂੰ ਮੁਕਾਬਲਾ ਹੋਇਆ ਸੀ। ਅਜੇ ਤੱਕ ਨਕਸਲੀਆਂ ਦੀ ਪਛਾਣ ਨਹੀਂ ਹੋ ਸਕੀ ਹੈ। ਪਹਿਲੀ ਨਜ਼ਰੇ ਇਹ ਜਾਪਦਾ ਹੈ ਕਿ ਇਹ ਮਾਓਵਾਦੀਆਂ ਦੀ ਪੀਐਲਜੀਏ (People’s Liberation Guerrilla Army) ਕੰਪਨੀ ਨੰਬਰ 6, ਪਲਟੂਨ 16 ਅਤੇ ਮਾਓਵਾਦੀਆਂ ਦੀ ਪੂਰਬੀ ਬਸਤਰ ਡਿਵੀਜ਼ਨ ਨਾਲ ਸਬੰਧਤ ਸਨ।
ਹਿੰਦੂਸਥਾਨ ਸਮਾਚਾਰ
