New Delhi: ਭਾਰਤੀ ਹਵਾਈ ਸੈਨਾ ਦੀ ਮੇਜ਼ਬਾਨੀ ’ਚ ਪਹਿਲੀ ਵਾਰ ਆਯੋਜਿਤ ਕੀਤੇ ਜਾ ਰਹੇ ਬਹੁ-ਰਾਸ਼ਟਰੀ ਹਵਾਈ ਅਭਿਆਸ ‘ਤਰੰਗ ਸ਼ਕਤੀ’ ਦਾ ਦੂਜਾ ਪੜਾਅ ਸ਼ੁੱਕਰਵਾਰ ਤੋਂ ਰਾਜਸਥਾਨ ਦੇ ਜੋਧਪੁਰ ਵਿੱਚ ਰਸਮੀ ਤੌਰ ‘ਤੇ ਸ਼ੁਰੂ ਹੋ ਗਿਆ। ਇਸ ਵਿੱਚ ਹਿੱਸਾ ਲੈਣ ਲਈ ਬੰਗਲਾਦੇਸ਼ ਤੋਂ ਇਲਾਵਾ ਅਮਰੀਕਾ, ਆਸਟ੍ਰੇਲੀਆ, ਗ੍ਰੀਸ, ਸਿੰਗਾਪੁਰ ਅਤੇ ਯੂਏਈ ਦੀਆਂ ਹਵਾਈ ਫੌਜਾਂ ਰੇਗਿਸਤਾਨੀ ਖੇਤਰ ਵਿੱਚ ਪਹੁੰਚੀਆਂ ਹਨ। ਇਹ ਪਹਿਲੀ ਵਾਰ ਹੈ ਜਦੋਂ ਹੇਲੇਨਿਕ ਏਅਰ ਫੋਰਸ ਵੀ ਚਾਰ ਗ੍ਰੀਕ ਲੜਾਕੂ ਜਹਾਜ਼ਾਂ ਨਾਲ ਇਸ ਅਭਿਆਸ ਵਿੱਚ ਹਿੱਸਾ ਲੈਣ ਲਈ ਭਾਰਤ ਆਈ ਹੈ।
ਤਰੰਗ ਸ਼ਕਤੀ ਦਾ ਦੂਜਾ ਅਤੇ ਆਖਰੀ ਪੜਾਅ ਰਾਜਸਥਾਨ ਦੇ ਜੋਧਪੁਰ ਵਿੱਚ 14 ਸਤੰਬਰ ਤੱਕ ਚੱਲੇਗਾ। ਅਭਿਆ ਦੇ ਦੂਜੇ ਪੜਾਅ ‘ਚ ਹਿੱਸਾ ਲੈਣ ਲਈ ਅਮਰੀਕਾ, ਆਸਟ੍ਰੇਲੀਆ, ਬੰਗਲਾਦੇਸ਼, ਸਿੰਗਾਪੁਰ, ਯੂਏਈ ਦੀਆਂ ਹਵਾਈ ਸੈਨਾਵਾਂ ਦੇ ਲੜਾਕੂ ਜਹਾਜ਼, ਹੈਲੀਕਾਪਟਰ, ਸਪੈਸ਼ਲ ਆਪਰੇਸ਼ਨ ਏਅਰਕ੍ਰਾਫਟ, ਮਿਡ-ਏਅਰ ਰਿਫਿਊਲਰ ਅਤੇ ਏਅਰਬੋਰਨ ਚੇਤਾਵਨੀ ਅਤੇ ਕੰਟਰੋਲ ਸਿਸਟਮ (ਅਵਾਕਸ) ਜਹਾਜ਼ਾਂ ਸਮੇਤ 70-80 ਜਹਾਜ਼ ਮਾਰੂਥਲ ਖੇਤਰ ਵਿੱਚ ਪਹੁੰਚ ਗਏ ਹਨ। ਅਮਰੀਕਾ ਆਪਣੇ ਐੱਫ-16 ਅਤੇ ਏ-10 ਜਹਾਜ਼ਾਂ ਨਾਲ ਇਸ ਅਭਿਆਸ ‘ਚ ਹਿੱਸਾ ਲਵੇਗਾ। ਇਸ ਪੜਾਅ ਵਿੱਚ 18 ਦੇਸ਼ ਨਿਗਰਾਨ ਵਜੋਂ ਹਿੱਸਾ ਲੈਣਗੇ। ਅਭਿਆਸ ਦਾ ਪਹਿਲਾ ਪੜਾਅ 6 ਤੋਂ 14 ਅਗਸਤ ਤੱਕ ਦੱਖਣੀ ਭਾਰਤ ਦੇ ਸੁਲੂਰ ਵਿੱਚ ਹੋਇਆ ਸੀ, ਜਿਸ ਵਿੱਚ ਜਰਮਨੀ, ਫਰਾਂਸ, ਸਪੇਨ ਅਤੇ ਬ੍ਰਿਟੇਨ ਦੀਆਂ ਹਵਾਈ ਫੌਜਾਂ ਨੇ ਹਿੱਸਾ ਲਿਆ ਸੀ।
ਭਾਰਤ ਵੱਲੋਂ ਹੇਲੇਨਿਕ ਆਰਮਡ ਫੋਰਸਿਜ਼ ਨਾਲ ਇਸ ਸਾਲ ਅਪ੍ਰੈਲ ਵਿੱਚ ਮਿਲਟਰੀ ਸਹਿਯੋਗ ਬਾਰੇ ਸਮਝੌਤਾ ਕੀਤੇ ਜਾਣ ਤੋਂ ਬਾਅਦ ਇਤਿਹਾਸ ਵਿੱਚ ਪਹਿਲੀ ਵਾਰ ਚਾਰ ਯੂਨਾਨੀ ਲੜਾਕੂ ਜਹਾਜ਼ ‘ਤਰੰਗ ਸ਼ਕਤੀ’ ਅਭਿਆਸ ਵਿੱਚ ਹਿੱਸਾ ਲੈਣ ਲਈ ਭਾਰਤ ਪਹੁੰਚੇ ਹਨ। ਇਸ ਤੋਂ ਪਹਿਲਾਂ ਭਾਰਤੀ ਸੁਖੋਈ-30 ਨੇ 2023 ‘ਚ ਗ੍ਰੀਸ ‘ਚ ਆਯੋਜਿਤ ਬਹੁਰਾਸ਼ਟਰੀ ਅਭਿਆਸ ‘ਇਨਿਓਚੋਸ’ ‘ਚ ਹਿੱਸਾ ਲਿਆ ਸੀ। ਹੁਣ ਹੇਲੇਨਿਕ ਏਅਰ ਫੋਰਸ ਦੇ ਚਾਰ ਐੱਫ-16 ਲੜਾਕੂ ਜਹਾਜ਼ ਭਾਰਤ ਦੀ ਮੇਜ਼ਬਾਨੀ ‘ਚ ਹੋਣ ਵਾਲੇ ਹਵਾਈ ਅਭਿਆਸ ‘ਚ ਹਿੱਸਾ ਲੈਣਗੇ, ਜਿਸ ਵਿੱਚ ਹਵਾਈ ਲੜਾਈ, ਰੱਖਿਆਤਮਕ ਅਤੇ ਹਮਲਾਵਰ ਕਾਰਵਾਈਆਂ, ਜ਼ਮੀਨੀ ਸਥਾਪਨਾਵਾਂ ਅਤੇ ਸਤਹ ਟੀਚਿਆਂ ‘ਤੇ ਹਮਲਾ ਕਰਨਾ ਅਤੇ ਵਿਦੇਸ਼ੀ ਬਲਾਂ ਨਾਲ ਸਹਿਯੋਗ ਸ਼ਾਮਲ ਹੈ। ਯੂਨਾਨੀ ਜਹਾਜ਼ ਸਭ ਤੋਂ ਪਹਿਲਾਂ ਤਾਮਿਲਨਾਡੂ ਦੇ ਸੁਲੁਰ ਏਅਰਬੇਸ ਪਹੁੰਚੇ, ਜਿੱਥੇ ਉਨ੍ਹਾਂ ਨੂੰ ਈਂਧਨ ਦਿੱਤਾ ਗਿਆ। ਫਿਰ ਯੂਨਾਨੀ ਲੜਾਕੂ ਜਹਾਜ਼ਾਂ ਨੇ ਦੋ ਭਾਰਤੀ ਸੀ-130 ਜਹਾਜ਼ਾਂ ਦੇ ਨਾਲ ਟੈਕਨੀਸ਼ੀਅਨ ਅਤੇ ਸਾਜ਼ੋ-ਸਾਮਾਨ ਲੈ ਕੇ ਜੋਧਪੁਰ ਲਈ ਉਡਾਣ ਭਰੀ।
ਹਿੰਦੂਸਥਾਨ ਸਮਾਚਾਰ
