Lausanne Diamond League 2024: ਭਾਰਤੀ ਜੈਵਲਿਨ ਥ੍ਰੋਅਰ ਨੀਰਜ ਚੋਪੜਾ ਵੀਰਵਾਰ ਨੂੰ ਲੁਸਾਨੇ ਡਾਇਮੰਡ ਲੀਗ ‘ਚ 89.49 ਮੀਟਰ ਦੇ ਸਰਬੋਤਮ ਥਰੋਅ ਨਾਲ ਦੂਜੇ ਸਥਾਨ ‘ਤੇ ਰਹੇ, ਜਦਕਿ ਗ੍ਰੇਨਾਡਾ ਦੇ ਐਂਡਰਸਨ ਪੀਟਰਸ ਨੇ 90.61 ਮੀਟਰ ਦੇ ਸ਼ਾਨਦਾਰ ਫਾਈਨਲ ਥ੍ਰੋਅ ਨਾਲ ਈਵੈਂਟ ‘ਚ ਚੋਟੀ ਦਾ ਸਥਾਨ ਪ੍ਰਾਪਤ ਕੀਤਾ।

ਨੀਰਜ ਨੇ ਰਾਤ ਦੇ ਜ਼ਿਆਦਾਤਰ ਸਮੇਂ ਤੱਕ 83 ਮੀਟਰ ਦੀ ਰੇਂਜ ਵਿੱਚ ਥ੍ਰੋਅ ਕਰਨ ਤੋਂ ਬਾਅਦ, ਪੰਜਵੇਂ ਅਤੇ ਛੇਵੇਂ ਯਤਨਾਂ ਵਿੱਚ ਦੋ ਕਲਚ ਥ੍ਰੋਅ ਕਰਕੇ ਅੰਤਰਰਾਸ਼ਟਰੀ ਟੂਰਨਾਮੈਂਟ ਵਿੱਚ ਚੋਟੀ ਦੇ ਦੋ ਵਿੱਚ ਰਹਿਣ ਦਾ ਰਿਕਾਰਡ ਬਰਕਰਾਰ ਰੱਖਿਆ। 26 ਸਾਲਾ ਨੀਰਜ ਨੇ 82.10 ਮੀਟਰ, 83.21 ਮੀਟਰ ਅਤੇ 83.13 ਮੀਟਰ ਥ੍ਰੋਅ ਨਾਲ ਸ਼ੁਰੂਆਤੀ ਸੰਘਰਸ਼ ਕੀਤਾ। ਇਸ ਤੋਂ ਵਧੇਰੇ ਉਚਾਈ ਤੱਕ ਪਹੁੰਚਣ ਵਿੱਚ ਉਨ੍ਹਾਂ ਦੀ ਅਸਮਰੱਥਾ ਦਾ ਮਤਲਬ ਸੀ ਕਿ ਪੀਟਰਸ, ਜੂਲੀਅਨ ਵੇਬਰ, ਆਰਟਰ ਫੈਲਨਰ ਅਤੇ ਰੋਡਰਿਕ ਡੀਨ ਜੇਨਕੀ ਵਰਗੇ ਖਿਡਾਰੀ ਉਨ੍ਹਾਂ ਨੂੰ ਪਛਾੜ ਗਏ। ਥ੍ਰੋਅ ਦੇ ਚੌਥੇ ਦੌਰ ਦੇ ਅੰਤ ਤੱਕ ਨੀਰਜ ਚੌਥੇ ਸਥਾਨ ‘ਤੇ ਸਨ।

ਇਸ ਤੋਂ ਬਾਅਦ ਮੌਜੂਦਾ ਵਿਸ਼ਵ ਚੈਂਪੀਅਨ ਨੇ ਆਪਣੀ ਪੰਜਵੀਂ ਕੋਸ਼ਿਸ਼ ਵਿੱਚ 85.58 ਮੀਟਰ ਦੀ ਥ੍ਰੋਅ ਨਾਲ ਸਿਖਰਲੇ ਤਿੰਨ ਵਿੱਚ ਪ੍ਰਵੇਸ਼ ਕੀਤਾ, ਇਹ ਯਕੀਨੀ ਬਣਾਇਆ ਕਿ ਉਹ ਫਾਈਨਲ ਥ੍ਰੋਅ ਲਈ ਦਾਅਵੇਦਾਰੀ ਵਿੱਚ ਬਣੇ ਰਹਿ ਸਕਦੇ ਹਨ।

ਪੀਟਰਸ ਨੇ 90.61 ਮੀਟਰ ਦੇ ਵੱਡੇ ਥ੍ਰੋਅ ਨਾਲ ਆਪਣਾ ਸਰਵੋਤਮ ਪ੍ਰਦਰਸ਼ਨ ਫਾਈਨਲ ਲਈ ਬਚਾ ਕੇ ਰੱਖਿਆ, ਜੋ ਉਨ੍ਹਾਂ ਦਾ ਇਸ ਸੀਜ਼ਨ ਦਾ ਸਭ ਤੋਂ ਵਧੀਆ ਅਤੇ ਮੀਟ ਰਿਕਾਰਡ ਹੈ। ਵੇਬਰ ਆਪਣੇ ਆਖ਼ਰੀ ਥ੍ਰੋਅ ਵਿੱਚ ਸਿਰਫ਼ 82.33 ਮੀਟਰ ਹੀ ਸੁੱਟ ਸਕੇ।

ਨੀਰਜ ਨੇ ਆਖ਼ਰੀ ਥ੍ਰੋਅ ਵਿੱਚ ਆਪਣਾ ਸਰਵੋਤਮ ਪ੍ਰਦਰਸ਼ਨ ਕੀਤਾ, ਪਰ ਜੈਵਲਿਨ 90 ਮੀਟਰ ਦੇ ਨਿਸ਼ਾਨ ਤੋਂ ਥੋੜਾ ਘੱਟ ਹੋਣ ਕਾਰਨ ਨਿਰਾਸ਼ ਹੋ ਗਏ। ਉਨ੍ਹਾਂ ਦਾ 89.49 ਮੀਟਰ ਦਾ ਥ੍ਰੋਅ ਇਸ ਸੀਜ਼ਨ ਦਾ ਸਰਵੋਤਮ ਅਤੇ ਹੁਣ ਤੱਕ ਦਾ ਦੂਜਾ ਸਰਵੋਤਮ ਪ੍ਰਦਰਸ਼ਨ ਹੈ, ਪਰ ਉਹ ਇਕ ਵਾਰ ਫਿਰ 90 ਮੀਟਰ ਦੇ ਅੰਕ ਤੋਂ ਖੁੰਝ ਗਏ।

ਹਿੰਦੂਸਥਾਨ ਸਮਾਚਾਰ