Bollywood News: ਸ਼ਰਧਾ ਕਪੂਰ ਅਤੇ ਰਾਜਕੁਮਾਰ ਰਾਓ ਦੀ ਫਿਲਮ ‘ਸਤ੍ਰੀ 2’ ਨੇ ਸ਼ਾਨਦਾਰ ਓਪਨਿੰਗ ਦੇ ਨਾਲ ਬਾਕਸ ਆਫਿਸ ‘ਤੇ ਧਮਾਲ ਮਚਾ ਦਿੱਤੀ ਹੈ। ਫਿਲਮ ਨੇ ਆਪਣੀ ਰਿਲੀਜ਼ ਦੇ ਪਹਿਲੇ ਦਿਨ ਕਈ ਰਿਕਾਰਡ ਤੋੜ ਦਿੱਤੇ ਅਤੇ ਹੁਣ ਪੰਜਵੇਂ ਦਿਨ ਇਸ ਨੇ ਜ਼ਬਰਦਸਤ ਕਮਾਈ ਕੀਤੀ ਹੈ।
ਸੈਕਨਿਲਕ ਦੇ ਅਨੁਸਾਰ, ‘ਸਤ੍ਰੀ 2’ ਨੇ ਪੰਜਵੇਂ ਦਿਨ ਯਾਨੀ ਸੋਮਵਾਰ ਨੂੰ 37 ਕਰੋੜ ਰੁਪਏ ਦਾ ਕਾਰੋਬਾਰ ਕੀਤਾ, ਜਿਸ ਤੋਂ ਬਾਅਦ ਇਸਦਾ ਕੁੱਲ ਬਾਕਸ ਆਫਿਸ ਕਲੈਕਸ਼ਨ 228.45 ਕਰੋੜ ਰੁਪਏ ਹੋ ਗਿਆ ਹੈ। ਫਿਲਮ ਨੇ ਪੇਡ ਪ੍ਰੀਵਿਊਜ਼ ਰਾਹੀਂ 8.35 ਕਰੋੜ ਰੁਪਏ ਕਮਾਏ ਸਨ। ‘ਸਤ੍ਰੀ 2’ ਨੇ ਵੀਰਵਾਰ ਨੂੰ ਭਾਰਤ ‘ਚ ਆਪਣੇ ਪਹਿਲੇ ਦਿਨ 60.3 ਕਰੋੜ ਰੁਪਏ ਕਲੈਕਸ਼ਨ ਕੀਤੀ। ਫਿਲਮ ਨੇ ਪਹਿਲੇ ਦਿਨ ਜ਼ਬਰਦਸਤ ਕਮਾਈ ਕੀਤੀ ਅਤੇ 2023 ‘ਚ ‘ਐਨੀਮਲ’ ਅਤੇ ‘ਪਠਾਨ’ ਦੀ ਪਹਿਲੇ ਦਿਨ ਦੀ ਕਮਾਈ ਨੂੰ ਪਿੱਛੇ ਛੱਡ ਦਿੱਤਾ। ਦੂਜੇ ਦਿਨ ਫਿਲਮ ਨੇ 31.4 ਕਰੋੜ ਦੀ ਕਮਾਈ ਕੀਤੀ। ਤੀਜੇ ਦਿਨ ਫਿਲਮ 43.85 ਕਰੋੜ ਦਾ ਕਾਰੋਬਾਰ ਕਰਨ ‘ਚ ਸਫਲ ਰਹੀ। ਚੌਥੇ ਦਿਨ 55 ਕਰੋੜ ਦਾ ਕਾਰੋਬਾਰ ਕੀਤਾ।
‘ਸਤ੍ਰੀ’ ਤੋਂ ਛੇ ਸਾਲ ਬਾਅਦ ਆਈ ‘ਸਤ੍ਰੀ 2’
ਫਿਲਮ ਵਿੱਚ ਸ਼ਰਧਾ ਕਪੂਰ, ਰਾਜਕੁਮਾਰ ਰਾਓ, ਅਪਾਰਸ਼ਕਤੀ ਖੁਰਾਣਾ, ਅਭਿਸ਼ੇਕ ਬੈਨਰਜੀ ਅਤੇ ਪੰਕਜ ਤ੍ਰਿਪਾਠੀ ਮੁੱਖ ਭੂਮਿਕਾਵਾਂ ਵਿੱਚ ਹਨ। ‘ਸਤ੍ਰੀ’ 2018 ‘ਚ ਰਿਲੀਜ਼ ਹੋਈ ਸੀ, ਛੇ ਸਾਲ ਬਾਅਦ ‘ਸਤ੍ਰੀ 2’ ਰਿਲੀਜ਼ ਹੋਈ ਅਤੇ ਇਸ ਫਿਲਮ ਨੂੰ ਦਰਸ਼ਕਾਂ ਦਾ ਚੰਗਾ ਹੁੰਗਾਰਾ ਮਿਲ ਰਿਹਾ ਹੈ।
ਹਿੰਦੂਸਥਾਨ ਸਮਾਚਾਰ
