Wimbledon 2024 News: ਸਪੈਨਿਸ਼ ਟੈਨਿਸ ਸਟਾਰ ਕਾਰਲੋਸ ਅਲਕਰਾਜ਼ ਨੇ ਕਿਹਾ ਕਿ ਵਿੰਬਲਡਨ ਖਿਤਾਬ ਜਿੱਤਣਾ ਉਨ੍ਹਾਂ ਲਈ ਇੱਕ ਸੁਪਨਾ ਹੈ। ਅਲਕਰਾਜ਼ ਨੇ ਲੰਡਨ ਦੇ ਸੈਂਟਰ ਕੋਰਟ ‘ਤੇ ਐਤਵਾਰ ਰਾਤ ਨੂੰ ਨੋਵਾਕ ਜੋਕੋਵਿਚ ਨੂੰ 6-2, 6-2, 7-6 (7-4) ਨਾਲ ਹਰਾ ਕੇ ਲਗਾਤਾਰ ਦੂਜਾ ਵਿੰਬਲਡਨ ਖਿਤਾਬ ਜਿੱਤਿਆ। ਮੈਚ ਤੋਂ ਬਾਅਦ ਅਲਕਰਾਜ਼ ਨੇ ਕਿਹਾ ਕਿ ਉਹ ਅੱਗੇ ਖੇਡਣਾ ਚਾਹੁੰਦੇ ਹਨ। ਉਨ੍ਹਾਂ ਨੇ ਕਿਹਾ ਕਿ ਸੈਂਟਰ ਕੋਰਟ ‘ਤੇ ਖੇਡਣਾ ਅਤੇ ਟਰਾਫੀ ਜਿੱਤਣਾ ‘ਬਹੁਤ ਵਧੀਆ ਭਾਵਨਾ’ ਸੀ।
ਏਟੀਪੀ ਦੀ ਅਧਿਕਾਰਤ ਵੈੱਬਸਾਈਟ ਦੇ ਹਵਾਲੇ ਤੋਂ ਅਲਕਰਾਜ਼ ਨੇ ਕਿਹਾ, “ਇਹ ਟਰਾਫੀ ਜਿੱਤਣਾ ਮੇਰੇ ਲਈ ਇੱਕ ਸੁਪਨਾ ਹੈ… ਮੈਂ ਖੇਡਣਾ ਜਾਰੀ ਰੱਖਣਾ ਚਾਹੁੰਦਾ ਹਾਂ ਪਰ ਇਸ ਖੂਬਸੂਰਤ ਕੋਰਟ ‘ਤੇ ਖੇਡਣਾ ਅਤੇ ਇਸ ਸ਼ਾਨਦਾਰ ਟਰਾਫੀ ਨੂੰ ਚੁੱਕਣਾ ਬਹੁਤ ਸ਼ਾਨਦਾਰ ਅਹਿਸਾਸ ਹੈ। ਇਹ ਸਭ ਤੋਂ ਖੂਬਸੂਰਤ ਟੂਰਨਾਮੈਂਟ, ਸਭ ਤੋਂ ਖੂਬਸੂਰਤ ਕੋਰਟ ਅਤੇ ਸਭ ਤੋਂ ਖੂਬਸੂਰਤ ਟਰਾਫੀ ਹੈ।’’
ਸਪੈਨਿਸ਼ ਟੈਨਿਸ ਖਿਡਾਰੀ ਨੇ ਕਿਹਾ ਕਿ ਉਨ੍ਹਾਂ ਨੇ ਜੋਕੋਵਿਚ ਦੇ ਖਿਲਾਫ 2024 ਵਿੰਬਲਡਨ ਫਾਈਨਲ ਵਿੱਚ ਸ਼ਾਂਤ ਅਤੇ ਸਕਾਰਾਤਮਕ ਰਹਿਣ ਦੀ ਕੋਸ਼ਿਸ਼ ਕੀਤੀ। ਉਨ੍ਹਾਂ ਨੇ ਇਹ ਵੀ ਮੰਨਿਆ ਕਿ ਇਹ ਸਖ਼ਤ ਮੈਚ ਸੀ। ੳਨ੍ਹਾਂ ਕਿਹਾ “ਇਹ ਮੇਰੇ ਲਈ ਮੁਸ਼ਕਲ ਸੀ। ਮੈਂ ਸ਼ਾਂਤ ਰਹਿਣ ਦੀ ਕੋਸ਼ਿਸ਼ ਕੀਤੀ, ਮੈਂ ਟਾਈਬ੍ਰੇਕ ਵਿੱਚ ਜਾ ਕੇ ਉਸ ਸਥਿਤੀ ਵਿੱਚ ਸਕਾਰਾਤਮਕ ਰਹਿਣ ਦੀ ਕੋਸ਼ਿਸ਼ ਕੀਤੀ ਅਤੇ ਆਪਣਾ ਸਰਵੋਤਮ ਟੈਨਿਸ ਖੇਡਣ ‘ਤੇ ਧਿਆਨ ਦੇਣ ਦੀ ਕੋਸ਼ਿਸ਼ ਕੀਤੀ। ਮੈਂ ਬੱਸ ਇੰਨਾ ਹੀ ਸੋਚ ਰਿਹਾ ਸੀ।” “ਮੈਂ ਸੱਚਮੁੱਚ ਖੁਸ਼ ਹਾਂ ਕਿ ਮੈਂ ਅੰਤ ਵਿੱਚ ਇੱਕ ਹੱਲ ਲੱਭਣ ਦੇ ਯੋਗ ਸੀ ਅਤੇ ਮੈਂ ਇਸ ਸਥਿਤੀ ਵਿੱਚ ਰਹਿ ਕੇ ਖੁਸ਼ ਹਾਂ।”
ਸਪੈਨਿਸ਼ ਟੈਨਿਸ ਖਿਡਾਰੀ ਨੇ ਵਿੰਬਲਡਨ 2024 ਦੇ ਫਾਈਨਲ ਵਿੱਚ ਚੰਗੀ ਸ਼ੁਰੂਆਤ ਕੀਤੀ ਅਤੇ ਸਰਬੀਆ ਦੇ ਮਹਾਨ ਖਿਡਾਰੀ ਜੋਕੋਵਿਚ ਖ਼ਿਲਾਫ਼ ਪਹਿਲਾ ਸੈੱਟ 6-2 ਨਾਲ ਜਿੱਤ ਲਿਆ। ਪਹਿਲਾ ਸੈੱਟ ਇੱਕਤਰਫਾ ਰਿਹਾ ਅਤੇ ਅਲਕਰਾਜ਼ ਨੇ 41 ਮਿੰਟਾਂ ਵਿੱਚ ਜਿੱਤ ਲਿਆ। ਅਲਕਰਾਜ਼ ਨੇ ਆਪਣੀ ਗਤੀ ਬਰਕਰਾਰ ਰੱਖੀ ਅਤੇ ਦੂਜਾ ਸੈੱਟ 6-2 ਨਾਲ ਜਿੱਤ ਲਿਆ।ਜੋਕੋਵਿਚ ਦੂਜੇ ਸੈੱਟ ਵਿੱਚ ਸੰਘਰਸ਼ ਕਰਦੇ ਹੋਏ ਵਾਪਸੀ ਕਰਨ ਵਿੱਚ ਨਾਕਾਮ ਰਹੇ। ਸਰਬੀਆਈ ਟੈਨਿਸ ਖਿਡਾਰੀ ਨੇ ਤੀਜੇ ਸੈੱਟ ਵਿੱਚ ਵਾਪਸੀ ਕਰਨ ਦੀ ਕੋਸ਼ਿਸ਼ ਕੀਤੀ ਪਰ ਅਲਕਰਾਜ਼ ਨੇ ਆਸਾਨੀ ਨਾਲ ਹਾਰ ਨਹੀਂ ਮੰਨੀ। ਜੋਕੋਵਿਚ ਨੇ ਤੀਜੇ ਸੈੱਟ ਵਿੱਚ ਚੰਗੀ ਸ਼ੁਰੂਆਤ ਕੀਤੀ ਅਤੇ ਆਪਣੇ ਵਿਰੋਧੀ ਨੂੰ ਸਖ਼ਤ ਟੱਕਰ ਦਿੱਤੀ ਪਰ ਸਪੈਨਿਸ਼ ਖਿਡਾਰੀ ਨੇ ਵਾਪਸੀ ਕੀਤੀ ਅਤੇ ਮੈਚ ਨੂੰ ਟਾਈਬ੍ਰੇਕ ’ਚ ਲਿਜਾਣ ਲਈ ਮਜ਼ਬੂਰ ਕਰ ਦਿੱਤਾ। ਅਲਕਰਾਜ਼ ਨੇ ਆਪਣਾ ਸੰਜਮ ਬਰਕਰਾਰ ਰੱਖਿਆ ਅਤੇ ਟਾਈਬ੍ਰੇਕ 7-4 ਨਾਲ ਜਿੱਤ ਕੇ ਖਿਤਾਬ ਵੀ ਆਪਣੇ ਨਾਮ ਕਰ ਲਿਆ।
ਹਿੰਦੂਸਥਾਨ ਸਮਾਚਾਰ
