New Delhi: ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਦੇ ਰਾਸ਼ਟਰੀ ਪ੍ਰਧਾਨ ਅਤੇ ਕੇਂਦਰੀ ਮੰਤਰੀ ਜਗਤ ਪ੍ਰਕਾਸ਼ ਨੱਡਾ ਅੱਜ ਕੇਰਲ ਦੇ ਤਿਰੂਵਨੰਤਪੁਰਮ ਵਿੱਚ ਰਾਜ ਵਿਸਤ੍ਰਿਤ ਕਾਰਜਕਾਰਨੀ ਦੀ ਬੈਠਕ ਨੂੰ ਸੰਬੋਧਨ ਕਰਨਗੇ। ਜ਼ਿਕਰਯੋਗ ਹੈ ਕਿ ਹਾਲ ਹੀ ਹੋਈਆਂ ਆਮ ਚੋਣਾਂ ‘ਚ ਭਾਜਪਾ ਨੇ ਕੇਰਲ ‘ਚ ਨਾ ਸਿਰਫ ਆਪਣੀ ਸੀਟਾਂ ਦੀ ਗਿਣਤੀ ਵਧਾਈ ਸੀ, ਸਗੋਂ ਆਪਣੇ ਵੋਟ ਸ਼ੇਅਰ ‘ਚ ਵੀ ਕਾਫੀ ਵਾਧਾ ਕੀਤਾ ਹੈ। ਭਾਜਪਾ ਨੇ ਜੇਪੀ ਨੱਡਾ ਦੇ ਕੇਰਲ ਦੌਰੇ ਦਾ ਪ੍ਰੋਗਰਾਮ ਆਪਣੇ ਐਕਸ ਹੈਂਡਲ ‘ਤੇ ਸਾਂਝਾ ਕੀਤਾ ਹੈ।
ਭਾਜਪਾ ਦੇ ਐਕਸ ਹੈਂਡਲ ਦੇ ਅਨੁਸਾਰ, ਨੱਡਾ ਸ਼ਾਮ 4 ਵਜੇ ਤਿਰੂਵਨੰਤਪੁਰਮ ਦੇ ਗਿਰੀਦੀਪਮ ਕਨਵੈਨਸ਼ਨ ਸੈਂਟਰ ਵਿੱਚ ਵਿਸਤ੍ਰਿਤ ਰਾਜ ਕਾਰਜਕਾਰਨੀ ਦੀ ਬੈਠਕ ਦੇ ਸਮਾਪਤੀ ਸੈਸ਼ਨ ਨੂੰ ਸੰਬੋਧਨ ਕਰਨਗੇ। ਦੱਸਿਆ ਜਾ ਰਿਹਾ ਹੈ ਕਿ ਨੱਡਾ ਅੱਜ ਸਵੇਰੇ 11:40 ਵਜੇ ਤਿਰੂਵਨੰਤਪੁਰਮ ਪਹੁੰਚਣਗੇ। ਪਾਰਟੀ ਦੇ ਸੀਨੀਅਰ ਅਹੁਦੇਦਾਰ ਉਨ੍ਹਾਂ ਦਾ ਸਵਾਗਤ ਕਰਨਗੇ। ਇਸ ਤੋਂ ਬਾਅਦ ਦੁਪਹਿਰ 12:20 ਵਜੇ ਭਾਜਪਾ ਪ੍ਰਧਾਨ ਅਹਿਮ ਸੰਗਠਨਾਤਮਕ ਬੈਠਕ ‘ਚ ਹਿੱਸਾ ਲੈਣਗੇ।
ਜਿਕਰਯੋਗ ਹੈ ਕਿ ਇਸ ਲੋਕ ਸਭਾ ਚੋਣ ਵਿਚ ਭਾਜਪਾ ਨੇ ਲਗਭਗ ਇਕ ਦਰਜਨ ਵਿਧਾਨ ਸਭਾ ਹਲਕਿਆਂ ਵਿਚ ਲੀਡ ਹਾਸਲ ਕੀਤੀ ਅਤੇ ਤਿਰੂਵਨੰਤਪੁਰਮ ਅਤੇ ਪਥਾਨਾਮਥਿੱਟਾ ਸਮੇਤ ਕਈ ਲੋਕ ਸਭਾ ਸੀਟਾਂ ‘ਤੇ ਸਿੱਧੇ ਤੌਰ ‘ਤੇ ਚੋਣ ਲੜੀ। ਲੋਕ ਸਭਾ ਚੋਣਾਂ ਵਿੱਚ ਭਾਰਤੀ ਜਨਤਾ ਪਾਰਟੀ ਨੇ ਪਹਿਲੀ ਵਾਰ ਕੇਰਲ ਵਿੱਚ ਆਪਣਾ ਖਾਤਾ ਖੋਲ੍ਹਿਆ ਹੈ। ਅਭਿਨੇਤਾ ਸੁਰੇਸ਼ ਗੋਪੀ ਨੇ ਤ੍ਰਿਸ਼ੂਰ ਲੋਕ ਸਭਾ ਸੀਟ ਤੋਂ ਭਾਜਪਾ ਦੀ ਟਿਕਟ ‘ਤੇ 72,000 ਤੋਂ ਵੱਧ ਵੋਟਾਂ ਨਾਲ ਜਿੱਤ ਦਰਜ ਕੀਤੀ ਹੈ।
ਹਿੰਦੂਸਥਾਨ ਸਮਾਚਾਰ
