Atlanta: ਪਨਾਮਾ ਨੇ ਜੋਸ ਫਜਾਰਡੋ ਦੇ ਅੰਤਮ ਪਲਾਂ ’ਚ ਗੋਲ ਦੀ ਬਦੌਲਤ ਵੀਰਵਾਰ ਨੂੰ ਸੰਯੁਕਤ ਰਾਜ ਅਮਰੀਕਾ (ਯੂਐਸਏ) ਨੂੰ 2-1 ਨਾਲ ਹਰਾ ਕੇ ਕੋਪਾ ਅਮਰੀਕਾ ਦੇ ਕੁਆਰਟਰ ਫਾਈਨਲ ਵਿੱਚ ਪਹੁੰਚਣ ਦੀਆਂ ਆਪਣੀਆਂ ਉਮੀਦਾਂ ਨੂੰ ਬਰਕਰਾਰ ਰੱਖਿਆ ਹੈ। ਮੇਜ਼ਬਾਨ ਅਮਰੀਕਾ ਦੀ ਟੀਮ ਮਰਸੀਡੀਜ਼-ਬੈਂਜ਼ ਸਟੇਡੀਅਮ ਵਿੱਚ 18ਵੇਂ ਮਿੰਟ ਵਿੱਚ 10 ਖਿਡਾਰੀਆਂ ਤੱਕ ਸਿਮਟ ਗਈ ਜਦੋਂ ਟਿਮੋਥੀ ਵੀਹ ਨੂੰ ਰੋਡਰਿਕ ਮਿਲਰ ਨੂੰ ਧੱਕਾ ਦੇਣ ਲਈ ਲਾਲ ਕਾਰਡ ਦਿਖਾਇਆ ਗਿਆ।
ਇਸ ਝਟਕੇ ਦੇ ਬਾਵਜੂਦ ਸੰਯੁਕਤ ਰਾਜ ਨੇ ਚਾਰ ਮਿੰਟ ਬਾਅਦ 22ਵੇਂ ਮਿੰਟ ਵਿੱਚ ਫੋਲਾਰਿਨ ਬਾਲੋਗਨ ਰਾਹੀਂ ਲੀਡ ਲੈ ਲਈ, ਜਿਨ੍ਹਾਂ ਨੇ ਐਂਟੋਨੀ ਰੌਬਿਨਸਨ ਨਾਲ ਮਿਲ ਕੇ ਖੱਬੇ-ਪੈਰ ਦਾ ਸ਼ਾਟ ਮਾਰਕੇ ਗੇਂਦ ਨੂੰ ਉਪਰਲੇ-ਸੱਜੇ ਕੋਨੇ ਤੋਂ ਗੋਲ ਪੋਸਟ ’ਚ ਭੇਜ ਦਿੱਤਾ। ਮੈਚ ਦੇ 26ਵੇਂ ਮਿੰਟ ਵਿੱਚ ਰਾਈਟ ਬੈਕ ਸੀਜ਼ਰ ਬਲੈਕਮੈਨ ਨੇ 18 ਗਜ਼ ਦੀ ਦੂਰੀ ਤੋਂ ਸ਼ਾਨਦਾਰ ਗੋਲ ਕਰਕੇ ਪਨਾਮਾ ਨੂੰ 1-1 ਦੀ ਬਰਾਬਰੀ ਦਿਵਾਈ। ਪਨਾਮਾ ਨੇ ਗੇਂਦ ਨੂੰ ਲਗਭਗ 75 ਫੀਸਦੀ ਨਿਯੰਤਰਿਤ ਕੀਤਾ ਅਤੇ ਸੰਯੁਕਤ ਰਾਜ ਦੇ ਮੁਕਾਬਲੇ ਲਗਭਗ ਤਿੰਨ ਗੁਣਾ ਪਾਸ ਪੂਰੇ ਕੀਤੇ।
ਮੈਚ ਦੇ 83ਵੇਂ ਮਿੰਟ ‘ਚ ਅਬਦਿਲ ਅਯਾਰਜ਼ਾ ਦੇ ਪਾਸ ‘ਤੇ 12 ਗਜ਼ ਦੀ ਦੂਰੀ ਤੋਂ ਫਜਾਰਡੋ ਨੇ ਗੋਲ ਕਰਕੇ ਪਨਾਮਾ ਨੂੰ 2-1 ਨਾਲ ਅੱਗੇ ਕਰ ਦਿੱਤਾ ਅਤੇ ਅੰਤ ‘ਚ ਇਹ ਸਕੋਰ ਫੈਸਲਾਕੁੰਨ ਸਾਬਤ ਹੋਇਆ। ਇਸ ਜਿੱਤ ਦੇ ਨਾਲ ਥਾਮਸ ਕ੍ਰਿਸਟੀਅਨ ਦੀ ਪਨਾਮਾ ਟੀਮ ਹੁਣ ਗਰੁੱਪ ਸੀ ਵਿੱਚ ਤੀਜੇ ਸਥਾਨ ‘ਤੇ ਹੈ, ਉਰੂਗਵੇ ਅਤੇ ਅਮਰੀਕਾ ਦੇ ਬਰਾਬਰ ਅੰਕ ਹਨ, ਪਰ ਗੋਲ ਅੰਤਰ ਘੱਟ ਹੈ।
ਹਿੰਦੂਸਥਾਨ ਸਮਾਚਾਰ
