Lok Sabha Election 2024: ਲੋਕ ਸਭਾ ਚੋਣਾਂ ਦੇ ਸੱਤਵੇਂ ਅਤੇ ਆਖਰੀ ਪੜਾਅ ਲਈ ਅੱਜ ਸਵੇਰੇ 7 ਵਜੇ ਵੋਟਿੰਗ ਸ਼ੁਰੂ ਹੋ ਗਈ ਹੈ। ਸੱਤਵੇਂ ਪੜਾਅ ਦੀਆਂ 13 ਸੀਟਾਂ ਵਿੱਚ ਮਹਾਰਾਜਗੰਜ, ਗੋਰਖਪੁਰ, ਕੁਸ਼ੀਨਗਰ, ਦੇਵਰੀਆ, ਬਾਂਸਗਾਂਵ (ਰਾਖਵੀਂ), ਘੋਸੀ, ਸਲੇਮਪੁਰ, ਬਲੀਆ, ਗਾਜ਼ੀਪੁਰ, ਚੰਦੌਲੀ, ਵਾਰਾਣਸੀ, ਮਿਰਜ਼ਾਪੁਰ ਅਤੇ ਰੌਬਰਟਸਗੰਜ (ਰਾਖਵੀਂ) ਸ਼ਾਮਲ ਹਨ। ਇਸ ਪੜਾਅ ‘ਚ 02 ਕਰੋੜ 50 ਲੱਖ 56 ਹਜ਼ਾਰ 877 ਵੋਟਰ ਹਨ, ਜੋ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਸਮੇਤ 144 ਉਮੀਦਵਾਰਾਂ ਦੀ ਕਿਸਮਤ ਦਾ ਫੈਸਲਾ ਕਰਨਗੇ।
ਰਾਜ ਦੇ ਮੁੱਖ ਚੋਣ ਅਧਿਕਾਰੀ ਨਵਦੀਪ ਰਿਣਵਾ ਅਨੁਸਾਰ ਸੱਤਵੇਂ ਪੜਾਅ ਵਿੱਚ ਕੁੱਲ 02 ਕਰੋੜ 50 ਲੱਖ 56 ਹਜ਼ਾਰ 877 ਵੋਟਰ ਹਨ। ਇਨ੍ਹਾਂ ਵਿੱਚੋਂ 1 ਕਰੋੜ 33 ਲੱਖ 10 ਹਜ਼ਾਰ 897 ਪੁਰਸ਼ ਵੋਟਰ ਅਤੇ 1 ਕਰੋੜ 17 ਲੱਖ 44 ਹਜ਼ਾਰ 922 ਮਹਿਲਾ ਵੋਟਰ ਹਨ। 1,058 ਤੀਜੇ ਲਿੰਗ ਦੇ ਵੋਟਰ ਹਨ। ਇਸਦੇ ਨਾਲ ਹੀ ਵੋਟਰਾਂ ਦੀ ਗਿਣਤੀ ਦੀ ਗੱਲ ਕਰੀਏ ਤਾਂ ਸਭ ਤੋਂ ਵੱਧ ਵੋਟਰ ਗੋਰਖਪੁਰ ਵਿੱਚ ਹਨ ਅਤੇ ਸਭ ਤੋਂ ਘੱਟ ਵੋਟਰ ਸਲੇਮਪੁਰ ਲੋਕ ਸਭਾ ਹਲਕੇ ਵਿੱਚ ਹਨ।
ਸੱਤਵੇਂ ਅਤੇ ਆਖਰੀ ਪੜਾਅ ਵਿੱਚ 13 ਲੋਕ ਸਭਾ ਹਲਕਿਆਂ ਵਿੱਚ ਕੁੱਲ 144 ਉਮੀਦਵਾਰ ਮੈਦਾਨ ਵਿੱਚ ਹਨ, ਜਿਨ੍ਹਾਂ ਵਿੱਚੋਂ 134 ਪੁਰਸ਼ ਅਤੇ 10 ਮਹਿਲਾ ਉਮੀਦਵਾਰ ਹਨ। ਸੱਤਵੇਂ ਪੜਾਅ ਵਿੱਚ ਸਭ ਤੋਂ ਵੱਧ 28 ਉਮੀਦਵਾਰ ਘੋਸੀ ਲੋਕ ਸਭਾ ਹਲਕੇ ਵਿੱਚ ਹਨ ਅਤੇ ਸਭ ਤੋਂ ਘੱਟ 07 ਉਮੀਦਵਾਰ ਦੇਵਰੀਆ ਅਤੇ ਵਾਰਾਣਸੀ ਲੋਕ ਸਭਾ ਹਲਕੇ ਵਿੱਚ ਹਨ।
ਮੁੱਖ ਚੋਣ ਅਫ਼ਸਰ ਨੇ ਦੱਸਿਆ ਕਿ ਭਿਆਨਕ ਗਰਮੀ ਅਤੇ ਹੀਟਵੇਬ ਦੇ ਮੱਦੇਨਜ਼ਰ ਸਾਰੇ ਪੋਲਿੰਗ ਸਟੇਸ਼ਨਾਂ ‘ਤੇ ਪੀਣ ਵਾਲੇ ਠੰਡੇ ਪਾਣੀ ਅਤੇ ਪੋਲਿੰਗ ਸਟੇਸ਼ਨਾਂ ‘ਤੇ ਛਾਂ ਦੇ ਪ੍ਰਬੰਧ ਕੀਤੇ ਗਏ ਹਨ। ਪੈਰਾਮੈਡਿਕਸ ਅਤੇ ਆਸ਼ਾ ਵਰਕਰ ਹਰੇਕ ਪੋਲਿੰਗ ਸਥਾਨ ‘ਤੇ ਲੋੜੀਂਦੀ ਮਾਤਰਾ ਵਿੱਚ ਓਆਰਐਸ ਅਤੇ ਮੈਡੀਕਲ ਕਿੱਟਾਂ ਨਾਲ ਮੌਜੂਦ ਰਹਿਣਗੇ। ਐਮਰਜੈਂਸੀ ਲਈ ਐਂਬੂਲੈਂਸ ਸੇਵਾ ਵੀ ਉਪਲਬਧ ਹੈ।
ਹਿੰਦੂਸਥਾਨ ਸਮਾਚਾਰ
