ਨਵੀਂ ਦਿੱਲੀ, 7 ਮਈ (ਹਿੰ.ਸ.)। ਪਹਿਲਗਾਮ ਅੱਤਵਾਦੀ ਹਮਲੇ ਵਿੱਚ ਮਾਰੇ ਗਏ 26 ਸੈਲਾਨੀਆਂ ਦੀਆਂ ਵਿਧਵਾਵਾਂ ਦੇ ਉੱਜੜੇ ਸਿੰਦੂਰ ਦਾ ਬਦਲਾ ਲੈਣ ਲਈ, ਮੰਗਲਵਾਰ ਅੱਧੀ ਰਾਤ ਨੂੰ ਸਿਰਫ਼ 25 ਮਿੰਟਾਂ ਦੇ ‘ਆਪ੍ਰੇਸ਼ਨ ਸਿੰਦੂਰ’ ਵਿੱਚ ਨੌਂ ਅੱਤਵਾਦੀ ਟਿਕਾਣਿਆਂ ਨੂੰ ਤਬਾਹ ਕਰ ਦਿੱਤਾ ਗਿਆ। ਸਰਹੱਦ ਪਾਰ ਕੀਤੇ ਬਿਨਾਂ, ਭਾਰਤ ਨੇ ਹੈਮਰ, ਸਕੈਲਪ ਅਤੇ ਮਿਜ਼ਾਈਲਾਂ ਨਾਲ ਪਾਕਿਸਤਾਨ ਅਤੇ ਪੀਓਕੇ ਵਿੱਚ ਜੈਸ਼-ਏ-ਮੁਹੰਮਦ, ਲਸ਼ਕਰ-ਏ-ਤੋਇਬਾ ਅਤੇ ਹਿਜ਼ਬੁਲ ਮੁਜਾਹਿਦੀਨ ਦੇ ਟਿਕਾਣਿਆਂ ਨੂੰ ਤਬਾਹ ਕਰ ਦਿੱਤਾ। ਇਨ੍ਹਾਂ ਵਿੱਚੋਂ ਸਭ ਤੋਂ ਮਹੱਤਵਪੂਰਨ ਮਰਕਜ਼ ਸੁਭਾਨ ਅੱਲ੍ਹਾ ਰਿਹਾ, ਜੋ ਕਿ ਬਹਾਵਲਪੁਰ ਵਿੱਚ ਸਥਿਤ ਜੈਸ਼-ਏ-ਮੁਹੰਮਦ ਦਾ ਮੁੱਖ ਦਫਤਰ ਸੀ।
ਬਹਾਵਲਪੁਰ ‘ਚ 15 ਏਕੜ ‘ਚ ਫੈਲਿਆ ਸੀ ਮਰਕਜ਼ ਸੁਭਾਨ ਅੱਲ੍ਹਾ
ਮਰਕਜ਼ ਸੁਭਾਨ ਅੱਲ੍ਹਾ ਜੈਸ਼-ਏ-ਮੁਹੰਮਦ ਦਾ ਸਭ ਤੋਂ ਮਹੱਤਵਪੂਰਨ ਅੱਤਵਾਦੀ ਕੇਂਦਰ ਸੀ, ਜੋ ਬਹਾਵਲਪੁਰ ਵਿੱਚ 15 ਏਕੜ ਦੇ ਖੇਤਰ ਵਿੱਚ ਫੈਲਿਆ ਹੋਇਆ ਹੈ। ਇਹ ਕੇਂਦਰ ਪੁਲਵਾਮਾ ਹਮਲੇ ਵਰਗੇ ਅੱਤਵਾਦੀ ਹਮਲਿਆਂ ਦੀ ਯੋਜਨਾਬੰਦੀ ਅਤੇ ਸਿਖਲਾਈ ਦਾ ਗੜ੍ਹ ਰਿਹਾ ਹੈ। ਮਰਕਜ਼ ਸੁਭਾਨ ਅੱਲ੍ਹਾ ਪਾਕਿਸਤਾਨ ਦੇ ਪੰਜਾਬ ਸੂਬੇ ਦੇ ਬਹਾਵਲਪੁਰ ਦੇ ਬਾਹਰਵਾਰ ਐਨਐਚ-5 ਕਰਾਚੀ-ਤੋਰਕ ਹਾਈਵੇਅ ‘ਤੇ ਕਰਾਚੀ ਮੋੜ ਦੇ ਨੇੜੇ ਸਥਿਤ ਹੈ। ਇਹ ਜੈਸ਼-ਏ-ਮੁਹੰਮਦ ਦਾ ਮੁੱਖ ਸਿਖਲਾਈ ਅਤੇ ਪ੍ਰਚਾਰ ਕੇਂਦਰ ਹੈ। ਜੈਸ਼-ਏ-ਮੁਹੰਮਦ ਦਾ ਇਹ ਕਾਰਜਸ਼ੀਲ ਹੈੱਡਕੁਆਰਟਰ 14 ਫਰਵਰੀ, 2019 ਦੇ ਪੁਲਵਾਮਾ ਹਮਲੇ ਸਮੇਤ ਕਈ ਅੱਤਵਾਦੀ ਯੋਜਨਾਵਾਂ ਨਾਲ ਜੁੜਿਆ ਹੋਇਆ ਹੈ। ਇਹ 2015 ਵਿੱਚ ਅਫਰੀਕੀ ਦੇਸ਼ਾਂ (ਯੂਕੇ ਸਮੇਤ) ਤੋਂ ਇਕੱਠੇ ਕੀਤੇ ਫੰਡਾਂ ਨਾਲ ਇਸਨੂੰ ਬਣਾਇਆ ਗਿਆ ਸੀ।
ਜੈਸ਼-ਏ-ਮੁਹੰਮਦ ਦਾ ਸਿਖਲਾਈ ਕੈਂਪ ਸੀ ਮਰਕਜ਼ ਸੁਭਾਨ ਅੱਲ੍ਹਾ
ਇਸ ਕੇਂਦਰ ਦੀ ਵਰਤੋਂ ਨੌਜਵਾਨਾਂ ਨੂੰ ਜੈਸ਼-ਏ-ਮੁਹੰਮਦ ਲਈ ਸਿਖਲਾਈ ਦੇਣ, ਵਿਚਾਰਧਾਰਾ ਦਾ ਪ੍ਰਚਾਰ ਕਰਨ ਅਤੇ ਅੱਤਵਾਦੀ ਗਤੀਵਿਧੀਆਂ ਦੀ ਯੋਜਨਾ ਬਣਾਉਣ ਲਈ ਕੀਤੀ ਜਾਂਦੀ ਸੀ। ਇਸ ਕੇਂਦਰ ਵਿੱਚ 600 ਤੋਂ ਵੱਧ ਕੇਡਰ (ਅੱਤਵਾਦੀ) ਰਹਿ ਕੇ ਸਿਖਲਾਈ ਲੈ ਰਹੇ ਸਨ। ਸੈਟੇਲਾਈਟ ਤਸਵੀਰਾਂ ਨੇ ਪੁਸ਼ਟੀ ਕੀਤੀ ਹੈ ਕਿ ਮਰਕਜ਼ ਸੁਭਾਨ ਅੱਲ੍ਹਾ ਦਾ ਸਿਖਲਾਈ ਕੈਂਪ, ਜਿਮਨੇਜ਼ੀਅਮ, ਸਵੀਮਿੰਗ ਪੂਲ ਅਤੇ ਹਥਿਆਰਾਂ ਦਾ ਡਿਪੂ ਪੂਰੀ ਤਰ੍ਹਾਂ ਤਬਾਹ ਹੋ ਗਿਆ। ਭਾਰਤ ਦੇ ਇਸ ਹਮਲੇ ਨੇ ਜੈਸ਼ ਅਤੇ ਆਈਐਸਆਈ ਨੂੰ ਵੱਡਾ ਝਟਕਾ ਦਿੱਤਾ ਹੈ, ਕਿਉਂਕਿ ਭਾਰਤ ਨੇ 100 ਕਿਲੋਮੀਟਰ ਅੰਦਰ ਤੱਕ ਸਟੀਕ ਹਮਲਾ ਕੀਤਾ ਹੈ।
ਜੈਸ਼ ਮੁਖੀ ਮਸੂਦ ਅਜ਼ਹਰ ਇਸਲਾਮਾਬਾਦ ‘ਚ
ਜੈਸ਼-ਏ-ਮੁਹੰਮਦ ਦੇ ਪ੍ਰਮੁੱਖ ਨੇਤਾ ਮੌਲਾਨਾ ਮਸੂਦ ਅਜ਼ਹਰ ਨੇ ਇਸ ਕੇਂਦਰ ਨੂੰ ਆਪਣਾ ਨਿਵਾਸ ਸਥਾਨ ਬਣਾਇਆ ਸੀ। ਇਸ ਵੇਲੇ, ਜੈਸ਼ ਮੁਖੀ ਮਸੂਦ ਅਜ਼ਹਰ ਇਸਲਾਮਾਬਾਦ (ਰਾਵਲਪਿੰਡੀ) ਵਿੱਚ ਪਾਕਿਸਤਾਨੀ ਅਧਿਕਾਰੀਆਂ ਦੀ ਸੁਰੱਖਿਆ ਹਿਰਾਸਤ ਵਿੱਚ ਹੈ। ਇਹ ਉਹ ਥਾਂ ਹੈ ਜਿੱਥੇ ਜੈਸ਼ ਦੇ ਅਸਲ ਮੁਖੀ ਮੁਫਤੀ ਅਬਦੁਲ ਰਊਫ ਅਸਗਰ ਅਤੇ ਜੈਸ਼ ਦੇ ਹਥਿਆਰਬੰਦ ਵਿੰਗ ਦੇ ਮੁਖੀ ਯੂਸਫ਼ ਅਜ਼ਹਰ (ਉਸਤਾਦ ਗੌਰੀ) ਨੇ ਅੱਡਾ ਬਣਾਇਆ ਸੀ। ਉਹ ਰਿਸ਼ਤੇ ’ਚ ਮਸੂਦ ਅਜ਼ਹਰ ਦਾ ਸਾਲਾ ਵੀ ਹੈ। ਇੱਥੋਂ ਹੀ ਅੱਤਵਾਦੀਆਂ ਨੂੰ ਰਾਈਫਲਾਂ, ਰਾਕੇਟ ਲਾਂਚਰਾਂ ਅਤੇ ਵਿਸਫੋਟਕਾਂ ਦੀ ਸਿਖਲਾਈ ਦਿੱਤੀ ਜਾਂਦੀ ਸੀ। ਸਰੀਰਕ ਸਿਖਲਾਈ ਲਈ, ਮਾਰਚ 2018 ਤੋਂ ਜਿਮਨੇਜ਼ੀਅਮ, ਜੁਲਾਈ 2018 ਤੋਂ ਸਵੀਮਿੰਗ ਪੂਲ ਅਤੇ ਡੂੰਘੇ ਪਾਣੀ ਵਿੱਚ ਡਾਈਵਿੰਗ ਕੋਰਸ ਚਲਾਏ ਜਾਂਦੇ ਸਨ।
ਆਪ੍ਰੇਸ਼ਨ ਸਿੰਦੂਰ’ ਪਹਿਲਗਾਮ ਹਮਲੇ ਦਾ ਜਵਾਬ
ਇਹ ਸਟੀਕ ਫੌਜੀ ਕਾਰਵਾਈ ‘ਆਪ੍ਰੇਸ਼ਨ ਸਿੰਦੂਰ’ 22 ਅਪ੍ਰੈਲ ਨੂੰ ਪਹਿਲਗਾਮ ਵਿੱਚ ਹੋਏ ਅੱਤਵਾਦੀ ਹਮਲੇ ਦੇ ਜਵਾਬ ਵਿੱਚ ਸੀ, ਜਿਸ ਵਿੱਚ 26 ਲੋਕ ਮਾਰੇ ਗਏ ਸਨ। ਇਸ ਕਾਰਵਾਈ ਦਾ ਮੁੱਖ ਨਿਸ਼ਾਨਾ ਮਰਕਜ਼ ਸੁਭਾਨ ਅੱਲ੍ਹਾ ਸੀ। ਮੌਲਾਨਾ ਰਫੀਕ ਉੱਲਾਹ ਨੂੰ 2022 ਤੋਂ ਇੱਥੇ ਮੁੱਖ ਇੰਸਟ੍ਰਕਟਰ ਵਜੋਂ ਤਾਇਨਾਤ ਕੀਤਾ ਗਿਆ ਹੈ ਤਾਂ ਜੋ ਕੱਟੜਪੰਥੀ ਵਿਚਾਰਧਾਰਾ ਦੀ ਧਾਰਮਿਕ ਸਿਖਲਾਈ ਦਿੱਤੀ ਜਾ ਸਕੇ। ਮਰਕਜ਼ ਸੁਭਾਨ ਅੱਲ੍ਹਾ 2019 ਦੇ ਪੁਲਵਾਮਾ ਹਮਲੇ ਦਾ ਸਿਖਲਾਈ ਕੇਂਦਰ ਸੀ, ਜਿਸ ਵਿੱਚ 40 ਸੀਆਰਪੀਐਫ ਜਵਾਨ ਸ਼ਹੀਦ ਹੋ ਗਏ ਸਨ। ਇਸ ਤੋਂ ਬਾਅਦ ਭਾਰਤ ਨੇ ਬਾਲਾਕੋਟ ਵਿੱਚ ਏਅਰ ਸਟ੍ਰਾਈਕ ਕੀਤੀ ਸੀ। ਮਰਕਜ਼ ਸੁਭਾਨ ਅੱਲ੍ਹਾ ਨੂੰ ਭਾਰਤੀ ਹਵਾਈ ਸੈਨਾ ਨੇ ਆਪ੍ਰੇਸ਼ਨ ਸਿੰਦੂਰ ਦੇ ਤਹਿਤ ਸਕੈਲਪ ਅਤੇ ਹੈਮਰ ਮਿਜ਼ਾਈਲਾਂ ਦੀ ਵਰਤੋਂ ਕਰਕੇ ਤਬਾਹ ਕਰ ਦਿੱਤਾ ਗਿਆ ਹੈ।
ਹਿੰਦੂਸਥਾਨ ਸਮਾਚਾਰ
