ਦੱਖਣੀ ਕੋਰੀਆ ਅੱਜ ਅਮਰੀਕੀ ਪੁਲਾੜ ਸਟੇਸ਼ਨ ਤੋਂ ਆਪਣਾ ਤੀਜਾ ਘਰੇਲੂ ਫੌਜੀ ਜਾਸੂਸੀ ਉਪਗ੍ਰਹਿ ਲਾਂਚ ਕਰੇਗਾ। ਦੱਖਣੀ ਕੋਰੀਆ ਨੇ ਪਿਛਲੇ ਕੁਝ ਸਮੇਂ ਤੋਂ ਉੱਤਰੀ ਕੋਰੀਆ ‘ਤੇ ਆਪਣੀ ਨਿਗਰਾਨੀ ਸਮਰੱਥਾ ਵਧਾਉਣ ਦੀਆਂ ਕੋਸ਼ਿਸ਼ਾਂ ਤੇਜ਼ ਕਰ ਦਿੱਤੀਆਂ ਹਨ। ਇਸ ਸੈਟੇਲਾਈਟ ਨੂੰ ਸਪੇਸਐਕਸ ਦੇ ਫਾਲਕਨ 9 ਰਾਕੇਟ ‘ਤੇ ਕੈਲੀਫੋਰਨੀਆ ਦੇ ਵੈਂਡੇਨਬਰਗ ਸਪੇਸ ਫੋਰਸ ਬੇਸ ਤੋਂ ਸਵੇਰੇ 3:34 ਵਜੇ (ਸਥਾਨਕ ਸਮੇਂ) ‘ਤੇ ਲਾਂਚ ਕੀਤਾ ਜਾਵੇਗਾ।ਦਿ ਕੋਰੀਆ ਟਾਈਮਜ਼ ਦੀ ਰਿਪੋਰਟ ਨੇ ਇਹ ਵੀ ਸਪੱਸ਼ਟ ਕੀਤਾ ਗਿਆ ਹੈ ਕਿ ਜੇਕਰ ਲਾਂਚਿੰਗ ਸਫਲ ਹੁੰਦੀ ਹੈ, ਤਾਂ ਉੱਤਰੀ ਕੋਰੀਆ ’ਤੇ ਬਿਹਤਰ ਨਿਗਰਾਨੀ ਦੇ ਲਈ 2025 ਤੱਕ ਪੰਜ ਮੱਧਮ ਤੋਂ ਵੱਡੇ ਆਕਾਰ ਦੇ ਜਾਸੂਸੀ ਉਪਗ੍ਰਹਿ ਨੂੰ ਹਾਸਲ ਕਰਨ ਦੀ ਯੋਜਨਾ ਦੇ ਹਿੱਸੇ ਵਜੋਂ ਇਹ ਦੱਖਣੀ ਕੋਰੀਆ ਦਾ ਤੀਜਾ ਫੌਜੀ ਜਾਸੂਸੀ ਸੈਟੇਲਾਈਟ ਹੋਵੇਗਾ।ਦੱਖਣੀ ਕੋਰੀਆ ਨੇ ਪਿਛਲੇ ਸਾਲ ਦਸੰਬਰ ਵਿੱਚ ਕੈਲੀਫੋਰਨੀਆ ਦੇ ਪੁਲਾੜ ਬੇਸ ਤੋਂ ਆਪਣਾ ਪਹਿਲਾ ਜਾਸੂਸੀ ਉਪਗ੍ਰਹਿ ਲਾਂਚ ਕੀਤਾ ਸੀ। ਇਹ ਧਰਤੀ ਦੀ ਸਤ੍ਹਾ ਦੇ ਵਿਸਤ੍ਰਿਤ ਚਿੱਤਰਾਂ ਨੂੰ ਕੈਪਚਰ ਕਰਨ ਲਈ ਇਲੈਕਟ੍ਰੋ-ਆਪਟੀਕਲ ਅਤੇ ਇਨਫਰਾਰੈੱਡ ਸੈਂਸਰਾਂ ਨਾਲ ਲੈਸ ਹੈ। ਦੇਸ਼ ਨੇ ਆਪਣਾ ਦੂਜਾ ਜਾਸੂਸੀ ਉਪਗ੍ਰਹਿ ਅਪ੍ਰੈਲ ਵਿੱਚ ਮੈਰਿਟ ਆਈਲੈਂਡ, ਫਲੋਰੀਡਾ ਦੇ ਜੌਹਨ ਐਫ ਕੈਨੇਡੀ ਸਪੇਸ ਸੈਂਟਰ ਤੋਂ ਲਾਂਚ ਕੀਤਾ ਸੀ। ਇਹ ਸਿੰਥੈਟਿਕ ਅਪਰਚਰ ਰਡਾਰ (ਐਸਏਆਰ) ਸੈਂਸਰ ਨਾਲ ਲੈਸ ਹੈ। ਇਹ ਕਿਸੇ ਵੀ ਮੌਸਮ ਵਿੱਚ ਮਾਈਕ੍ਰੋਵੇਵ ਦੀ ਵਰਤੋਂ ਕਰਕੇ ਡਾਟਾ ਕੈਪਚਰ ਕਰਦਾ ਹੈ।
ਦੱਖਣੀ ਕੋਰੀਆ ਦੇ ਰੱਖਿਆ ਅਧਿਕਾਰੀਆਂ ਨੂੰ ਉਮੀਦ ਹੈ ਕਿ ਅੱਜ ਦੀ ਲਾਂਚਿੰਗ ਉੱਤਰੀ ਕੋਰੀਆ ਦੇ ਪ੍ਰਮਾਣੂ ਅਤੇ ਮਿਜ਼ਾਈਲ ਖਤਰਿਆਂ ਦੇ ਵਿਰੁੱਧ ਫੌਜ ਦੇ ਤਿੰਨ-ਅਯਾਮੀ ਨਿਗਰਾਨੀ ਪ੍ਰੋਗਰਾਮ ਨੂੰ ਹੋਰ ਹੁਲਾਰਾ ਦੇਵੇਗੀ। ਤੀਜੇ ਲਾਂਚ ਦੀ ਨਿਗਰਾਨੀ ਰੱਖਿਆ ਪ੍ਰਾਪਤੀ ਪ੍ਰੋਗਰਾਮ ਪ੍ਰਸ਼ਾਸਨ ਮੰਤਰੀ ਸੀਓਕ ਜੋਂਗ-ਗਨ ਦੁਆਰਾ ਕੀਤੀ ਜਾ ਰਹੀ ਹੈ। ਉੱਤਰੀ ਕੋਰੀਆ ਨੇ ਨਵੰਬਰ 2023 ਵਿੱਚ ਆਪਣਾ ਪਹਿਲਾ ਫੌਜੀ ਜਾਸੂਸੀ ਉਪਗ੍ਰਹਿ (ਮਾਲਿਗਯੋਂਗ-1) ਸਫਲਤਾਪੂਰਵਕ ਲਾਂਚ ਕੀਤਾ ਸੀ।
ਹਿੰਦੂਸਥਾਨ ਸਮਾਚਾਰ
